काठमाडौं । कोशी प्रदेशका प्रमुख पर्शुराम खापुङले प्रदेश सभाको विशेष अधिवेशन आह्वान गरेका छन् । प्रदेश सभाका एक चौथाइभन्दा धेरै प्रदेश सभा सदस्यले दिएको पत्रको आधारमा प्रदेश प्रमुख खापुङले आउँदो वैशाख ६ गतेका लागि विशेष अधिवेशन आह्वान गरेका प्रदेश प्रमुखको कार्यालयका प्रवक्ता नरेन्द्रकुमार श्रेष्ठले जारी गरेको विज्ञप्तिमा उल्लेख छ ।
अस्ति सोमवार नेकपा एमाले र नेकपा माओवादी केन्द्रका सांसदले विशेष अधिवेशन आह्वान गर्न लिखित रूपमा माग गरेका थिए । सोमवार नै मुख्यमन्त्री केदार कार्कीले जेठ ११ गते प्रदेश सभा अधिवेशन बोलाउन प्रदेश प्रमुखसमक्ष सिफारिस गरेका थिए ।
एमाले र माओवादीले मुख्यमन्त्री कार्कीलाई दिएको समर्थन सोमवार नै फिर्ता लिएका छन् । विशेष अधिवेशनमा मुख्यमन्त्री अल्पमतमा पर्ने र उनले राजीनामा दिनुपर्ने वा विश्वासको मत लिनुपर्ने गठबन्धनको भनाइ छ । मुख्यमन्त्री कार्कीले भने संविधानअनुसार सरकार बन्ने अन्तिम धाराबमोजिमको सरकार भएकाले पदबाट राजीनामा पनि नदिने विश्वासको मत पनि नलिने बताउँदै आएका छन् ।
कार्की नेपाली कांग्रेसबाट विद्रोह गरेर गएको असोज २७ गते मुख्यमन्त्री बनेका हुन् । एमाले र माओवादीले यो सरकारलाई विस्थापित गरेर नेकपा (एमाले) संसदीय दलका नेता हिक्मतबहादुर कार्की नेतृत्वमा नयाँ सरकार बनाउने बताएका छन् ।
तपाईको प्रतिक्रिया दिनुहोस