काठमाडौं महानगरपालिका वडा नम्बर १६, बनस्थली स्थित सिर्जनशील बस्ती टोल सुधार समितिले सेफ्टी एण्ड सेक्यूरिटी सम्बन्धि एकदिने कार्यशाला गोष्ठीसहितको तालिम सम्पन्न गरेको छ । हिमालयन सेफ्टी एण्ड सेक्यूरिटी कम्पनीको सहकार्यमा सम्पन्न उक्त तालिमबाट टोलभित्रका ५५ घरमा बसोबास गर्ने नागरिकलाई तालिम प्रदान गरिएको हो ।

​जसअन्तर्गत भान्सा सुरक्षा, घर सुरक्षा, ग्याँस सिलिण्डरको जोखिम र सुरक्षा, एस्टिङगिजरको प्रयोग र आगलागीका बेला जीवनरक्षा सम्बन्धि विषयमा तालिम दिइएको टोल सुधार समितिका अध्यक्ष राजेन्द्रप्रसाद लामिछानेले जानकारी दिए । ‘पछिल्लो समय हाम्रा घर भित्र र बाहिर विभिन्न कारणले गर्दा हुने असुरक्षालाई ध्यानमा राखी टोलबासीलाई तालिम प्रदान गरेका हौँ,’ उनले भने, ‘यसबाट टोलमा अकस्मात हुने दुर्घटनाबाट कसरी बच्ने उपायका बारेमा विज्ञमार्फत टोलबासीलाई सुसूचित गराएका हौं।’

​तालिम पश्चात टोलभित्र रहेका ५५ वटै घरमा आगो निभाउन प्रयोग गरिने यन्त्र फायर एस्टिङगिजर समेत जडान गरिएको उनले बताए । ‘एउटा टोल सुधार समितिले गरेको यो काम सम्भवतः नेपालमै पहिलोपटक हुनसक्छ,’ उनले भने, ‘आगामी दिनमा अन्य सुरक्षा कवचका लागि पनि हामीले प्रयास गरिरहेका छौँ ।’

​तालिम समापन कार्यक्रमका प्रमुख अतिथि एवम् काठमाडौं महानगरपालिका वडा नम्बर १६ का कार्यबाहक वडाध्यक्ष पुष्प महर्जनले टोल सुधार समितिले गरेको कामलाई प्रशंसा गरे । साथै, वडाले पनि टोल सुरक्षामा विशेष ध्यान दिइरहेको र आगामी दिनमा टोल सुधार समितिहरुसँग सहकार्य गरी अझै नवीन कार्यहरु गर्ने प्रतिवद्धतासमेत व्यक्त गरे । समितिले गरेको बाटो ढलान, खाने पानीको लाइन व्यवस्थापन, ढल व्यवस्थापनको कार्य, सढक बत्ती जडानका कार्यहरु काठमाडौं महानगर पालिकाकै उदाहरणीय कार्य भएको वडा सदस्य हर्कबहादुर खाँतीको भनाइ छ । टोल विकास समितिले गरेका कार्यहरु सबैका लागि अनुकरणीय देखिन्छ । टोलमा कतै पनि असुरक्षा, फोहोर देखिदैन । साँझको समय त सढक बत्तीका कारण टोल झनै सुन्दर देखिन्छ । टोलको बसाई राम्रो रहेको डा रामचन्द्र पाण्डे र पूर्व सिडियो हरिकृष्ण पौडेलको भनाइ छ ।