काठमाडौं, १२ जेठ । नेकपा (माओवादी)का सांसद लेखनाथ दाहाल (राजन)ले तत्कालिन प्रधानमन्त्री केपी शर्मा ओलीको पालामा पशुपतिनाथको मन्दिरमा लगाइएको सुनको जलहरीमा भ्रष्टाचार गरेर पित्तल लगाएको भनेर बिहीबारको संसद बैठकमा बोलेपछि आज एमालेले सदन अबरुद्ध गरेको छ । तर महालेखा परीक्षकको कार्यालयले आफ्नो ५९औं प्रतिवेदनमा जलहरी बनाएर बाँकी रहेको सो सुनको सबै परिमाण रिङ बनाउन प्रयोग भएको पुष्टि हुने विवरण नपाइएको उल्लेख गरेको थियो । महालेखाले हराएको सुन कति हो भन्ने यकिन गर्न भने सकेको छैन । पशुपति क्षेत्र विकास कोषले पशुपति शिवलिङ्गको गर्भगृहलाई पूर्ण रूपमा ढाक्ने गरी राखिने सुनको जलहरी निर्माण कार्यको लागि यो वर्ष नेपाल राष्ट्र बैंकबाट १०३ किलो ७७३ ग्राम सुन रू।८० करोड ११ हजारमा खरिद गरेको थियो । विभिन्न शुद्धताको प्रतिशत रहेको सुनमा अन्य धातु र रसायनको मिश्रण तामा २ किलो ८९० ग्राम, चाँदी १ किलो २४९ ग्राम, जिंक १२ किलो ७५० ग्रामसमेत प्रयोग गरी १०७ किलो ४९० ग्राम सुन कायम भएको भनिएको थियो ।बनेको जलहरी, जलधारा, नाग, नागमूर्ति, सुनको किलालगायतमा प्रयोग भएको सुनको तौल ९६ किलो ५१४ ग्राम रहेको र बाँकी रहेको सुन १० किलो ९७६ ग्रामको रिङ बनाई जलहरीमा लगाएको कोषले जनाएको छ । ‘रिङ बनाउन प्रयोग भएको सुनको मूल्य रू।७ करोड ८६ लाख ४६ हजार रहेको छ,’ महालेखाले प्रतिवेदनमा भनेको छ,’जलहरी बनाएर बाँकी रहेको सो सुनको सम्पूर्ण परिमाण रिङ बनाउने कार्यमा प्रयोग भएको पुष्टि हुने विवरण पेस गरेको छैन ।’ प्रतिनिधिसभा विघटन गरेर निर्वाचन घोषणा गरेको अवस्थामा तत्कालीन प्रधानमन्त्री केपी शर्मा ओली पशुपतिनाथ मन्दिर पुगेर दर्शन गरेपछि मन्दिरमा सुनको जलहरी राख्न ३० करोड रुपैयाँ दिने घोषणा गरेका थिए । त्यही घोषणापछि पशुपति क्षेत्र विकास कोषले सुनको जलहरी निर्माण गरेर पशुपतिनाथको मूर्तिमा राखेको थियो । जुन विषय अहिले ‘११ किलो सुन हिनामिना विवाद’ मा परिणत भएको थियो र कोषका पदाधिकारी अख्तियार दुरुपयोग अनुसन्धान आयोग धाउने अवस्था आएको थियो । पशुपतिको शिवलिंगमा चढाइने अर्घ, जल तथा पञ्चामृत खस्ने भागमा लगाइने धातुको पाता नै जलहरी हो । शिवलिंगमा चढाइने सबै तरल पदार्थ जलहरीबाट ब्रहृमनालमा पुग्छ । यसअघि तामा र त्यसपछि चाँदीको जलहरी राखिएकोमा अहिले सुनको जलहरी राखिएको थियो । जलहारी राख्ने काम नसकिंदै विवाद भएपछि हतार–हतार गत १२ फागुन २०७७मा राष्ट्रपति विद्यादेवी भण्डारीलाई लगेर क्षमापूजा गराइएको थियो । एमाले अध्यक्ष ओलीलाई संसदबाट ‘भ्रष्टचारी करार’ गरिएपछि… एमालेले गलत नगरेको भए किन डराएको त ?: राजन दाहाल