Techie IT
×
गृहपृष्ठप्रदेशबाग्मती प्रदेशचेपाङका छोराछोरी टुकी बालेर पढ्न बाध्य

चेपाङका छोराछोरी टुकी बालेर पढ्न बाध्य


चितवन, १२ मंसिर । इच्छाकामना गाउँपालिका–१ डिङ्लाङका चन्द्रबहादुर चेपाङका छोराछोरी अहिले पनि टुकी बालेर पढ्न बाध्य छन्। यो परिवार मात्रै होइन सदरमुकाम भरतपुरसँग जोडेर बनेको चितवन क्षेत्र नं २ मा पर्ने इच्छाकामना र कालिका नगरपालिकाका पहाडी भेगका कतिपय गाउँ अहिले पनि टुकीकै भर छ।

इच्छाकामना गाउँपालिका–१ र २ का धेरैजसो भूभागमा विद्युत् पुगेको छैन। वडा नं ३, ४, ५ र ६ का केही भागमासमेत विद्युत् पुग्न सकेको छैन। वडा नं १ को छाप्राङ, भाराङ, ज्यान्दालालगायतका ठाउँका बासिन्दा टुकीकै भरमा छन्। वडा नं २ का डुम्किन, भोटेगाउँ, हपनी, माथिल्लो काउले जस्ता भागमा पनि बिजुली छैन।

कालिका नगरपालिकाको वडा नं ९, १० र ११ का धेरै भागमा विद्युत् पुग्न बाँकी छ। वडा नं ८ को बुङ्गखोला क्षेत्रमा पनि बिजुली पुगेको छैन। भरतपुर महानगरपालिका–२९ का केही घरमा अझै बिजुली पुगेको छैन।

इच्छाकामना गाउँपालिकामा नेपाल विद्युत प्राधिकरणको सामुदायिक विभागले विसं २०७५ साल कात्तिक १२ गते बोलपत्र आह्वान गरी काम लगाएको भए पनि ठेकेदारले काम नगर्दा परियोजना अलपत्र छ। विभागका निर्देशक विक्रम अमात्य दुई वर्षको मिति सक्किएपछि जनमुखी कन्स्ट्रक्सन–बागमती कङ्क्रिट जेभीलाई कारबाही प्रक्रिया अगाडि बढाएकोमा अदालत पुगेका कारण काम रोकिएको बताए।

अदालतको फैसला कुर्नु परेकाले काम हुन नसकेको उनको भनाइ छ। ठेक्का आयोजना पाँच करोड सात लाख रुपैयाँमा सकारेको कम्पनीले एक सय २० थान पोल झार्नेबाहेक केही काम नगरेपछि ठेक्का रद्द गरिएको छ। पत्र बुझ्नुअघि नै अदालत गएपछि काम रोकिएको अमात्य बताउँछन्।

उक्त मुद्दाको पेशी मङ्सिर २० मा परेकाले यसपछि विकल्पको खोजी गरिने अमात्यको भनाइ छ। कालिका नगरपालिकामा विद्युतीकरणका लागि रत्ननगर वितरण केन्द्रले काम गरिरहेको छ। इञ्जिनियर विक्रम श्रेष्ठ मजदूरका लागि ठेकेदार कम्पनीलाई जिम्मा दिइएको भए पनि प्राधिकरणले सामान दिन नसक्दा समस्या भएको उनको भनाइ छ।


क्याटेगोरी : समाचार, बाग्मती प्रदेश
ट्याग : #tuki


सम्बन्धित समाचार