अमेरिकी अर्थतन्त्रमा चीन र भारतका विद्यार्थीहरूबाट हुने आम्दानी ठूलामध्येको एक

काठमाडौ । अमेरिकाको अर्थतन्त्रमा विदेशी विद्यार्थीहरूबाट हुने आम्दानी ठूलामध्येको एक आम्दानीको स्रोत रहेको छ । तीमध्ये चीन र भारतका विद्यार्थीहरुबाट हुने आम्दानी अन्य देशहरुको तुलनामा धेरै रहेको छ । अमेरिकी सरकारले हालै सार्वजनिक गरेको विदेशी विद्यार्थीहरु सम्बन्धी एक प्रतिवेदनमा यस्तो जनाइएको छ ।

सन् २०१९को ‘ओपन डोर्स रिपोर्ट अन दी इन्टरनेशनल एजुकेशन एक्सचेन्ज’ अनुसार शैक्षिक सत्र २०१८–१९मा अमेरिकामा अन्तर्राष्ट्रिय विद्यार्थीहरुको संख्या १० लाख बढी रहेको थियो । तीमध्ये चिनियाँ विद्यार्थीहरुको संख्यापछि अमेरिकामा भारतीय विद्यार्थीहरुको संख्या रहेको थियो । चीन र भारत दुबै गरी अमेरिकामा बसी पढ्ने विदेशी कुल विद्यार्थीहरुमा आधा भन्दा बढी रहने गरेको पाइएको छ ।

अमेरिकामा भारतीय विद्यार्थीहरुको संख्या सन् २०१८–१९मा पहिलो पटक दुई लाख नाघेको थियो । सन् २०१२–१३ मा भारतीय विद्यार्थीहरुको संख्या एक लाख मुनि थियो । द ओपन डोर्स रिपोर्टले सार्वजनिक गरेको आँकडा द इन्स्टिच्युट अफ इन्टरनेशनल एजुकेशनको वेबसाइटबाट लिइएको जनाएको छ ।

भारतीय विद्यार्थीहरुको संख्या एक लाख मुनि रहेका बेला चिनियाँ विद्यार्थीहरुको संख्या दुई लाख ३५हजार पाँच सय ९७ थियो । सन् २०१८–१९मा चिनियाँ विद्यार्थीहरुको संख्या तीन लाख ६९ हजार पाँच सय ४८ रहेको बेला भारतीय विद्यार्थीहरुको संख्या दुई लाख दुई हजार १४ जना रहेको देखिन्छ । त्यतिखेर अमेरिकामा विदेशी विद्यार्थीहरुको कुल संख्या १० लाख ९५ हजार दुई सय ९९ रहेको थियो ।

अन्तर्राष्ट्रिय विद्यार्थीहरुबाट अमेरिकाले हुने आम्दानी ४१ अर्ब अमेरिकी डलर बराबरको रहेको र यसले अमेरिकाको विभिन्न क्षेत्रमा गरी करिब चार लाख ६० हजार रोजगार सिर्जना गरेको रिपोर्टमा जनाइएको छ ।

अमेरिकाले लगाएको भिसा बाधाका कारण सन् २०१९मा दर्ता हुने नयाँ विदेशी विद्यार्थीहरुको संख्यामा गिरावट आएको जनाइएको छ ।

चीन र भारतबाट आउने विद्यार्थीहरुको संख्यामा देखिएको गिरावटमा अमेरिकामा चिन्ता व्यक्त गरिएको छ ।

सम्बन्धित समाचार

ठुलो विस्फोटन भएपछि क्राइमियाको मायस्कोए गाउँका बासिन्दा निकाल्न आदेश

अमेरिकाको वाल स्ट्रिटमा रुसी ऋणपत्रको कारोबार फेरि सुरु

फिफाले भारतीय फुटबल महासंघलाई निलम्बन गर्यो

एफबीआईद्वारा पूर्व राष्ट्रपति ट्रम्पका पासपोर्टहरू जफत